مقطوعات

منتصف الليل منتصف العمر، منتصف الطريق منتصف الحرية  منتصف الهزيمة منتصف الملل منتصف النشوة.
نرجسية مقلوبة و نرجسية عجيبة، بوردر لين، هروب، فرار من اللحظة الى ما وراء الجدار دون زانة أو بلورة سحرية .
تطهير مكاني مستمر تطهير عرقي مستمر كل شي ترانسفير مستمر  تفاوض مستمر نضال مستمر بس في خلل؟ زعامات تكرر نفسها، إعادة تشكل النخب صناعة وطنية عربية ذات قوة تنافسية عالية في سوق العولمة الشرس، نخبنا تتناسخ مثل الجراد في عواصم ريتشارد قلب الأسد.

 في النكبة و في عرس غسل العار هم أبطال .
شعب الخيام  و شعب الهجرة اللوكس، من هو المنكوب؟ ومن هو الشهيد القادم؟
 يعجبني فينا فخرنا و ثقتنا و نرجسيتنا، و أقول هل صدقنا أننا شعب الجبارين؟ ربما أنا وحدي المهزوم  والشعب منتصر و القضية بألف خير. هي و لاشك  الهزائم الفردية من تنفث سمومها في حال الارادة الجماعية. ربما  هم على حق  لماذا الخوف فالغد لنا و أوباما جاد في تصريحاته حول  حل الدولتين ، حتى مشعل يعتبرها إيجابية… ثم، على طريقة فيصل القاسم في الاتجاه المعاكس، عفوا عفوا، يعني هذا الشعب الفلسطيني المشرد  و الاعزل  كيف له ان لا يتأمل خيرا في أوباما  العم أوباما  يعني ليش مش هو العم سام الأسود يعني ما بطلعلوا يكون العم سام. يعني يعني  ما هم الفلسطينيين مثل الغريق الذي يتعلق بقشة؟ شو ممكن يعملوا  ما شفنا الحرب على غزة يعني شو عملت الجيوش العربية  و يعني ها المقاومة شو عملت بشوية هالصواريخ، الالعاب النارية  و على رأي واحد صاحبنا مخرج و فلسطيني  يعني بقولك أذا كان هذا انتصار معنتو كمان إنتصارين ثلاث لهلمقاومة ما بضل و لابيت في غزة. رد أيش ردك شو ممكن تقولوا؟

بس لحظة، يعني عفوا، ليش هذا الشعب غريق؟ من وصلنا هون؟ هيك من الله يعني صرنا بلليلة ويوم صرنا شعب مشرد وغريق، لا مش اختبار  و لا سخام  ومش مؤامرة حبوب بكفي ضحك و إستخفاف بالله تبعنا، عصب الزلمة….

إنتو فهمين شو بصير هون  صرنا  مسخرة لبعض و بس على بعض.
زمان كان لما يرسم ناجي  الشعب يتفرج و يضحك و من المرارة   و يفكر و يشتم  ويقاتل و أو يشتم غرب أمريكا وعرب النفط وزلم عرفات ، اليوم وين اختلافنا اليوم عندك قطر مهد الثقافة العربية المعاصرة و السعودية رعت إتفاق مكة وعرب أمريكا بابا زعمات البلد ليش هو فياض وين كان سعادتو من البنك الدولي جبوا، وهو البنك الدولي وين يا رفيق في بيت لقيا ليكون في بيت حانون ما هو في أمريكا يا خالتي. وزلم عرفات الله يسهل على هظيك الايام يا خالتي طلع ما فيش غيروا عرفات زلمة والباقي يا خالتي والله طلعوا خرنع. اه أيام زمان يا خالتي كان الله يرحموا   غسان يكتب في الشراع و الحرية و الفدائيين بقولوا قربت. شد شد قربت الرملة على اللد  مين اليوم بقول اللد والرملة فلسطينية  ستك الله يرحمها ..
الماض رحم لزج يا أستاذ  هيك برد عليك المثقف اليوم . أو على رأي واحد صاحبينا  مستثقف  هذا مش مثقف  شكلوا ما سمع المستثقف  عن على حرب  وكيف أعدم المثقفين في كتابو وهم النخبة و ما قرأ مثقفنا الفلسطيني فرانز فانون  المعذبون في الارض  وما سمع مثقفنا الفلسطيني عن النرجسية و الذهنية المتخلفة و الالعاب الذاتية السخيفة التي يلعبها المرء مع نفسه أو العكس. وبلاش نبعد ما قرأ  كتاب  بلال الحسن ثقافة الاستسلام أو  مثقفين في خدمة الاخر خليها على الله الشعب فاهم بس الاخ مفكر حالو مفتح في بلاد عميان.
على كل حل الناس بتقرأ و عارفة الطبخة.
بعجبني كمان اليسار الفلسطيني  رهيب هذا اليسار في البحث عن الاختلاف و التسابق على الحداثة و الاستيراد  أستيراد المعرفة بروح الواحد منهم على باريس الله ما أقنعوا أنو هو مش العقاد ولا طه حسين و سارتر و فوكو … والصبايا يا أبو الشباب أنسى ما تقول غير غادة السمان وعلى شوي سيمون دي بفوار واذا متواضعة بتقبل في أحلام مستغانمي.  يسار أخوة فلاتة اليوم ماركسن بكرا تروتسيين بعدين برجعوا  مرة شيوعين  وفي ليلة ما فيها ضو قمر  عينك ما تشوف الا النور صاروا الجماعة حلاويلة يا حلاويلة على رأى الشيخ إمام صرنا هلا مودرن، بلشوا يكتشفو التفكيك  والحداثة وما بعد الحداثة  وميشل فوكو ومش فوكو ونيتشة وأميل دوركايم وزرادشت و الصوفية و البوذية و راحو على غاندي وميلوا على التبت  وخبطوا في زرع فوكو ياما و كوشنر و نظرية  التدخل الانساني ومن نيحريا و النيحر و موزبيق ورام الله شعب واحد مش شعبين، و لايموت كمان؟ وغيروا وغيراتو.

اللي بوحع البطن هاي الشيزوفرنية القاتلة عند مثقفنا مرات ما تقول غير جيفارا ومرات بتحسو ضارب على أرثر رامبو هيك تسكع وشعر وجمع ثروة مش واضحه أموروا..
فيك تقول ملغوص..
ما أختلافناش الجماعة فهمنين   بس يعني واجد يشرحلي ياها كيف يعني هيك  حتى وحدة أكتشفوا  انتليجسيتهم  في التسول أمام الممولين لحقوق الانسان و التنمية و التطبيع و حوار الاديان .
هلا بطلعلك واحد فهمان بقولك و الحل يا عم حمزة. حل شو  و لمين  يا رفيق؟
أشي بخليك تحس انو في في راسك مياة قديمة على رأي واحدة صحبتنا.
لا والله شىء مش مفهوم كيف كيف بالله عليكم  واحد يقولي هذا الجيل  اللي أقرف سمانا في بطولاتهم  من أيام  معركة الكرامة  و حصار قلعة شقيف و عد عاد معارك و فتوحات. شو بالله عليكم هضول شو  ورثونا  شو خلولنا ؟ والله خراريف مزعة على راي واحد صاحبنا من عرب أسه . قال شو مش عاجبو عزمي بشارة ،  الرفيق شيوعي قح بصوت للحزب الشيوعي الاسرائيلي. وبجوز ميرتس حتى روح أعرف . لالا هي  ثقيلة بلاش بزعل.
حلوة هي قصة عرب إسه  وعرب الجهالين و فلسطينية الضفة و أهل القدس وولاد المخيمات و فلاحين بقر، ولاجىء يا حرام بعرفش، وبضربوا السياحة في بيت لحم بقولك الياس فريج. لا وشو كمان  أحنا برشلونة انتو مين تشلسي؟
أنسى موضع الكتائب خلصنا معا هذا من يوم ما أحى العم دايتون خلص هلا بابا الكتائب شغالة مسرح و بيس بيلدنغ  وبوست كونفلكت راحت إيام مكان صعب علينا نلفظ كورنفلكس خلص فكينا العقدة و رخينا الاحزمة عن البطون بدنا نعيش يا رفيق.
والبلد ماشية كيف ماشية ما حدا عارف سمعين عن الاوشا و الانروا و اليون دي ب  و الاليات الدولية المؤقتة  و صندوق اغذاء العالمي  و المناشدة الدولية لسد رمق الجياع و نظريات و أطاريح دكتوارة نزلة شمط في هالشعب من وين ما بدك ؟ كينكي على رأي صاحبنا كان في  مضارب ريتشارد قلب الاسد ومسك وكالة الكينكي عنا….. شوف  يا رفيق مين بعمل كينكي لمين.
مين الي ماسك البلد يا جماعة  بلش البلد ما تبقي من هالبلد.
بنوك و شركات و انجيؤز وسلطة و مؤسسات دينية  وكنائس و جوامع و عشائر وجاهات  شو ببيعو هضول؟
الشعب لا مسكين و لا خ….. الشعب متكيف مع الوضع  رافع شعار لا غالب الا الله..
الصراع الطبقي  لا ختى مش الصراع الطبقي الطبقات كمفهوم  مش واصل  عند السوسيولوحين الفلسطينين مشغولين في تجميع طوابع بريد نرجسيتهم الارستقراطية. و طبعا هيك بنام الكل مرتاح  واجد بقولك الله غالب و احد بقولك خليها على الله. وهلم جرا…
من كم يوم  بحكي مع  صاحبي في بيت لاهيا، بحكيلوا عن وظيفة  معلنة في جريدة القدس، بحكيلي أنو ما في جرايد فلسطينية أوغيرها بتدخل على غز صحافة صفراء على رأي العم لينين. بقرار من سلطة حماس. بشرفكم هاي كمان بدنا نعلقها على شماعة  الاحتلال الوديع ؟

الكل شغال في هالشعب.

يعني شو نظام الضفة نزل سلخ  فينا وفي ليبرمان و نتنايهو دعوات  تفاوض و جماعتنا في غزة نزلين  سلخ هدن و حوارات ومليون ونص في غزة معهمش خبر بلا جرايد و لا نت و بجوز الستلايت حرموا؟ روح أعرف عاد وين راحين.

في نظرية مؤامرة في الموضع  هاي التكنولوجيا  مؤامرة نيو ليبرالية  تستخدم الشبكة العنكبوتية و الثورة الألكترونية..
من أنترنت و فيس بوك و صناديق بريد طايرة بسرعة ما بعلم فيها الا  بل غيتش . هي كلها مؤامرة برانويية  هدفها حرف الشاب العربي و الفلسطيني و المسلم عن القيام بواجبهم وكنس هذه الانظمة المستنسخة و المتهالكة، على راي مظفر هي الدمى بالصمغ و الدبابيس واقفة  روح احكي للعم مظفر بالصمغ بالدبابيس بس واقفة من يوم معاوية لعباسنا؟  بقولك واحد بقولوا عنو تشيع؟

بجيك الخطر الآيراني  الشعب صار خبير في الملف الايراني ونظرية الهلال الشيعي. خلص حلنا كل شىء فهمنا ضل إيران ندرسها و نفهم قصة الشيعة ؟
وكمان بعجبوني المثقفين الشباب قال شو واحد والله بسوي مديتشن في نيبال…. عند الماوين يا رفيق ؟
واحدة زيو بدها تروح سياحة على هايتي من باب السياجة الانترنتيف.
واحدة حبوبة من جماعة  االحاسوب المحمول  …الأبل مش الإبل … مرة في الفورد من القدس على رام الله  بتحكي على التلفون/ الحبوبة شو بتقول قال. أحنا أورردي قطعنا معبر مخيم  قلنديا؟ أورردي قطعنا معبر مخيم  قلنديا…… يعني هاي بدهش شرح أور ردي و مخيم ومعبر هيك كلهم مرة وحدة مش راكبين على بعض .لالالا ؟ طيب ليش كيف صار فينا هيك.
بطلعلك كمان واجد يساري من قاع الدست بقولك هذا هو إغتراب المثقف  عن الواقع . أو بمزعك  محاضرة عن الأتو إستشراق .
شو بدك تقولوا  خلي..
ما البلد كلها رايحة.

والله هالبلد بدها مسرح يا جماعة ؟